القاهرة 03 اكتوبر 2017 الساعة 10:40 ص
كمـــــين
الخوف علي مرمي البصر
عامل كمين للحلم
علي كل جبهات الطريق
عينك تشدك للشمال
يخطفك
قلبك يزقّك ع اليمين
يوقفك
ترمح تجاعيد الزمن ع الوش
بالمشوار
لعنة حصار تفنيك
تنده : مفيش
كل الحدود إتقفّلت ف عنيك
تصرخ : مفيش
كل الحروف إتلجّمت / جوّاك
تحزن : مفيش
كل العيون إتسبّلت
إلاك ..
زي كل الغلابه .. صايمين عن كل شيئ
إلا إنتظار الحلم
ودموع العياط
مابيطيّرش حمام
الحلم فرحه وحيده ..
حضنها يدفّي , إحساسي بالدنيا انها ..
لسّه ف ضهري وف صفّي ..
واقفه علي حيلها
الحلم اول حد عيونه ممكن تشغلها
زي فرسان الحواديت
وساعات بيبقي الحلم روح بتشيط
ومولّعه هدومي
وانا نومي تقيل ..
والعمر صاحي ضحكتين ناقصين
والحزن بيكمّل
اربع فصول ف السنه غاوي ..
يقتل القتيل ويمشي ف جنازته
ويلم شوك الوجع ويبعتره مشاوير
ف سكّة الفرح اللي راجع من أجازته ..
والخطوه مش ليكِ
وعنيّا ف عنيكِ والجرح بوح الغرام
والحضن مش حضنك
والحلم من برجك مابيطيّرش حمام ..
أنّته ف الهوي طرح الزمان الجميل ..
ترتيل
ودنيا بتقفل ع الوجع ساعه
وتفتح ع الامل البديل