القاهرة 18 يوليو 2017 الساعة 10:25 ص
(1)
الألــــــــــوان
م الالوان
واختاري لون يعجبك
لون ف القسوه يشبه دنيتك الرخيصه
حطّي أسود ع السواد
وارسمي الدمعه الحريصه ..
تبقي واضحه
خليكي ناصحه زي عادتك
كمّلي خطة قساوتك ..
علي حد كان طيّب قوي
واختاري لون ..
طول عمره دايماً عنصري
حطّي أبيض ع البياض
واتبسّمي ..
هو ده شكل الخيانه لمّا تتلوّن
هو ده وجع القصيده وانت فيها ..
صعب أي كلام يهوّن
(2)
أول غربتي
___________
أول غربتي بُعدك
ومكنش بينّا ع الفراق علامات
أول غربتي ريحة سكات ..
مالياني ف غيابك ..
ومكشّره نابك عليّه
واحلم كأني بضيع
وافرح بإديكِ أول وطن ليّه ..
فارد جناح وبيضلّل
ياحبيبتي هي كده الاوطان
لما تئن / بتغربل
وان كان وجع داقها
وان كان زمان انكسر ف أوراقها
عنيك لما تضم عشّاقها ..
تقدر تقوم وتكمّل
(3)
دايره علي كعوبها
_________________
ملان كاسها
ولو تحطّك يوم ف راسها ..
إشرب بقي ياجميل
شمسك هـ تحضن ليل ..
بيعاني / جف النَدا
بايعاني رغم النِدا بيئن ع الاوتار
وارسم عيونك وطن ..
سكتنا فيه واحْده / تكسرنا فيه وِحْده
حضنك سنين جاحده
والرحله روح بتدور دايره علي كعوبها
وقت أما يدّن غروبها ..
عصفور ف ساعة لقا قتله الحصار
(4)
طبيعي لو تحضنك
_________________
طبيعي جمالها
طبيعي يبقي البعيد حلمك والتقيل حملك ..
كسّر مجاديفك
واتبعترت خطاويك
طبيعي يحصل منها اكتر من كده لعنيك
طبيعي لو تحضنك والحضن كان قسوه
طبيعي لو ترسمك علي وشّها نزوه
وتحط ايديك ف ايديها
- ياعبيط ..
عايزاك تعدّيها الطريق وتسيبك
مالهاش حبايب ف السفر لما تكون ناويه
منفوخه بس متهاويه
شايفاك من كل زاويه
بس انت اللي مش شايف حد غيرها
بتضم زي الوطن / خنقه
بتحن زي التاريخ .. / عاجز ف تغييرها
(5)
مابيطيّرش حمام
________________
الحلم فرحه وحيده ..
حضنها يدفّي , إحساسي بالدنيا انها ..
لسّه ف ضهري وف صفّي ..
واقفه علي حيلها
الحلم اول حد عيونه ممكن تشغلها
زي فرسان الحواديت
وساعات بيبقي الحلم روح بتشيط
ومولّعه هدومي
وانا نومي تقيل ..
والعمر صاحي ضحكتين ناقصين
والحزن بيكمّل
اربع فصول ف السنه غاوي ..
يقتل القتيل ويمشي ف جنازته
ويلم شوك الوجع ويبعتره مشاوير
ف سكّة الفرح اللي راجع من أجازته ..
والخطوه مش ليكِ
وعنيّا ف عنيكِ والجرح بوح الغرام
والحضن مش حضنك
والحلم من برجك مابيطيّرش حمام
ولا بيزرع غيطان
ولا بيرسم شمس ع الفساتين
والطيبين مش داخل حدود عطفك
إنت القصيده والزمان وصفك / شاعر ..
أنّته ف الهوي ترتيل
(6)
ناكلها بملح
______________
بيفوت ..
كل ليـــله
وزي كل ليه يفوت ..
خطوته ..
زي فرحتنا بليلة العيد لما يجي ..
زي لعبة طفل بيحضنها بحب / حقيقي
ضحكته ..
مَسْ النهار الورد بكفوف الرضا
كلمته ..
ناكلها بملح بس برضا
والعشق صادق حتي ف جنونه
ونلوّن الصوره بأمل
والحزن نلوّنه بلونه ,
والدمع وبحوره
والحلم وقصوره ..
وإنت نازله البحر تملي ..
من عيون البحر غنوه ..
للمحروم ,
وغنوه للمهموم بداء القرب
لعيونك ..
حريّه من بعد الشقا
ياورده ف كتاب الوجود / بينّا الربيع
وازاي هيجي الربيع
ومايكونش ما بينّا لقا ؟!
(7)
بتحلف ع الأمل ماينام
________________
هيّه موته ولا اكتر
ف حدّوته ف بنّوته ف حالة حزن بتكسّر ..
صوابع ضحكتك ليّه ..
مواسم شوق ببتتشعبط ..
علي كفوف النهار غيّه
وتكتب ع الندا موّال
تفوت ف العتمه
وبتحلف ع الامل ماينام
وبتدخل علينا الفصل ف الاحلام
وتقول قيام ..
بكره اما تيجوا ماتنسوش ..
الوطن قبل الهتاف
والحلم قبل الكراسات
والفرح زي الملح رشّوه ف الهوا
كتب التاريخ بتعيد تفاصيل اللي راح
وعنيكِ نقطة الارتكاز
ومصرّه رغم الهم تزرع سوسنه
وتهد سور الحزن وتنادي الصباح