القاهرة 11 يوليو 2017 الساعة 10:44 ص
8 يمامات
ونبق أخضر
وتوته ف ضهر جميزه
وعود جلوين
وعود نعناع
بيرعوا ف أرض خُبّيزه
ويونس....
لسّه بيشرّب عزيزه الشاى
8 يمامات
ونبق أخضر
وبوصة ناى
وضحكة شمس مكسوفه لولد نسّاى
وصوت لربابه حكّايه
وجدع حكّاى....
بيبدر ورد ع السكّه
وبنت وواد
وحلم كبير على الدكه
وست عجوزه بتحاول
تلمّ بقيت جنيه فكه اتبدر من دبدبات القطر
..... ونقطه
ومن بداية السطر
8 يمامات
وعصفورتين
وجوز غربان وحدّايه
بدايه كويسه لمطلع قصيدة حب
بدايه تطمّن الرب
اللى واقف يرصد الحواديت
بدايه تبيّت الكتاكيت
فى سلّة مهملات العمر
بدايه...
تطفّى جمر الروح من الإحساس
بدايه...
تريّح الحراس من التفكير
ومن تزييقة الترباس
ونقطه صغيّره خالص
ومن أول حدود الراس
8 يمامات
وطير أبيض
وبوز نسناس
وقلب بيشتهى المخاليق
وقلب بيشتهيه الناس
وإيد ريّس وإيد كنّاس
وصوت عيّل غبى وهلاس...
بينده صيّادينه الدون
8 يمامات
وبنيّه وشجر كمّون
وفرع زتون
وصياد بربرى وظربون
وورده ف إيد ولد شايل
فى عبّه خلاصة المضمون
وشاى بحليب
وشاى بلمون
وريس ماسك العربون ومتّاخر
وحبّيب لسه مستنظر
يقابل وشها الفاخر
وبنت بتلعب السيجا
وجدع بيجيب من الآخر وبيدحرج قصيدة شوق
وحيط واقف يبص لفوق
وحيط مفلوق من الركنه
وإيد بتنش دبَّانتين وإيد ساكنه
وشوش بيضا
ووشوش سودا
ووشوش داكنه
وكلمة حب مش ماكنه ف قصيد الروح
8 يمامات
وواد عاشق
وواد مدبوح
ومش مسموح
يكون الضحك من جوّه
ومش مسموح
تكون النوّه بالقوّه
ومش ممكن
يكون هوّ اللى هز البال
ومش ممكن
يكون فاعل ومحطوط حال
ومش ممكن
يكون منصوب على الخلخال
ولا مرفوع على أكتافنا
ولا مفعول لسيافنا اللى داب م الجوع
8 يمامات وطير أبيض
ومارد غيّر فى الموضوع
وصوت عالى على الطرقات
وهمس ملايكه مش مسموع
وسير شغّال على الفاضى
وسير مقطوع
ومولانا اللى بيزعّق
وقف بخشوع
لصياد
قلبه مش مطبوع على الكنبات
لصياد
وشه كله عباره عن شنبات
لصياد
عمّر الخرطوش بلح أمهات
ومستنظر على السكه الـ 8 يمامات