|
القاهرة 04 مارس 2026 الساعة 03:30 م
شعر: جمال الشيمي
آاااه
قوللى ياحج بتاخد إيه
أااخد .. أنا عمرى م خدت
أنا جيت الدنيا وبادّى وبس
أنا بقصد أنت بتاخد أدويه إيه
انا باخد ريفو وسعات برشام للضغط
ليه كان عندك جلطة
أيوه وعملت دعامة زمان
آااه مش هاقدر أديلك بنج
الحاله بتاعتك ليها شروط
وظروفك مابتسمحش
بص يا دكتور !
سيبك م الحاله وركّز
بصراحة
من غير تزويق
دى سادس عمليه ف شهر
ولا حدش قبلك قال
البنج خطر !
آسف ماقدرش أديك
بص يا دكتور
الفرق م بيني وبينك
إنك شايف م الدنيا الدنيا
وأنا شايف منها الموت
هوب .. سكوت .. كلاكيت .. هانصور فلم الموت
اهدى .. اتنفس بهدوء
أيوه كلها أنفاس
ودى حقنه بنج
مش شيشة ولا حفل حشيش
فتح عينك جهز أوتار نخشيشك
ماتشدش بس خلاص اسمعنى
أنا هاكتب لك إقرار
وأدينى الرد
إنى موافق آخد بنج .. لو حتى هاموت
أوووه أنا رافض ...
.. لو تكتب ميت إقرار
برضه قرارى قرار
لو كنت يا عم الحج جاى ونفسك فى الموت
أنا عمرى م أساعد أقتل حد
طب قول أنت يادكتور
اهدى الأول قبل م تنطق
إيه الفرق ما بين الموت
والعمر اللى مضيته سكوت
حط الحقنة وخلينى أنام
أو أموت
مش فارق إني أعيش فى الحلم
أو بربخ للارواح
اسمع
العمر بطوله أهو ليك
وأنا برضه .. م أقدرش اديك
عن إذنك سلامات .. ربنا يشفيك
أووووه
وعليكم ألفين سلامات
مش عايز منك بنج !
أنا طول العمر .. مبنّج ربانى
وحياتى سكوت
وعرفتك من غير ما تقول
واحد عادى وخايف م الموت
وأنا عمرى ماخوفتش من حد
مع إن الصخب الضاني المنصوب من حولي
وبعيد عن حولي أو قولي
بيعدى سعات ويضحك
ويقرب
وأبص عليه وأستغرب
وأقول وأنا مالي
وأنا مالي وانا مالي وأنا مالي
وأنا مالي يابوي
أبوي ..
أبوي أهو مات
كان سبع الرجالة وفات
وحياته حياة .. هربت من مخ نجيب
لا كتبها ف حرافيشه
ولا قالها ف بستانه وريشه
أبوي
وبدون العيلة
كان وحده قبيلة وخال
والشال على كتفه ب ميت موال
اسكت ماتسيبه أبوك !
ماتصدق تتكلم عنه
إبعتله الرحمة وسيبه ف حاله
الناس عنديها كتير م الهم
وبتكره كتر التكرار
أحرار
حتى إن كانت مكبوتة ف ميت أحوال
أحرار
مش عايزه أبوك ولا أخوك
وأبوك أهو مات
سيدنا محمد مات
ااااه على طعم الشعر الحلو
من غير الشاعر لما بتستنى عيونه
نظرة إعجاب
بواب مش شاعر
بيقول الشعر عشان الناس
طالع من حنفية
ماصخ وهباب
وكأنه ف بقه فحل بصل
والأعجب إن السامع بيجيه على عقله
وبيسقف ويقول ده عسل
حتى الشعر الطارح قوت
الخارج طازه من الملكوت
بيروح فى حديد على إيد الشاعر .. ويموت
حتى الشعر يموت
يووه
مش بس الشعر اللى يموت
ولا كان البنج سبب للموت
دا أنا كل قريّب منى باشوفه يموت
محمود !
ولدى الطيب والعاقل
لما يسيبني أموت ويسافر
مع إن دراعي المربوط فى جهاز الضغط يعافر
كان إمبارح منصوب من تحته وشايله وحامل همه
ولا عمره إنحاش عن ضمه
ولحد الموت ولا هان ولا كان هايهون
دراعى .. آه يا دراعى
قاعد أبص عليه
والحقنة بتخرم فيه
وأقوله
شوفت وجع يا دراع
ويقولى وداع
العمر أهو ضاع
بلا محمود بلا ممدود
إعتبره .. من بين الاموات
خليك فى البنج وف العملية وفى الأوجاع
أحلى قصص للحب تموت
نواره .. وسماح وشهيرة
ليلى وهناء ورحاب
ابواب فى كتاب العمر
ولحد ما نوصل أخر باب
بنشوف الموت بيصارع ياخد كل جميل
حتى الكدبة المحبوكة بفن وخبث الستات
مش بتبات مع طلعة شمس
بتصحّى الصدق النايم وتبان
وبتوقع زى م قامت يوم وتموت
وحبايب وأصحاب
أيوه ..
حتى الصاحب بيموت
مع قفلة تلفونه وهو يقول الفين سلامات
وكأنه م قاللي!
وكأنه م صدق إن الوقت يفوت
ويسيبك وحدك للموت
والدنيا بتاخد ما تخلي
والباب المفتوح راح يقفل علشان ما نصلى
حدث ولا تذكر اسم
ماهى كل الأسماء بتموت
ملعون أبو كل ما فيها يا دكتور
مش عايز بنج
ولا عايز أشوفك تاني
وف لحظة خرجة رجللك من أوضة العمليات
هاعتبرك برضك شخص ومات
زى م كل حاجات بتموت ..
|