القاهرة 12 يوليو 2022 الساعة 01:13 م
معارضة شعرية: يحيى إبراهيم
• معارضة لأغنية الفنان المبدع محمود شكوكو "حبيبي شغل كايرو"، من تأليف أبو السعود الإبياري
حبيبي شغل كايرو
جرجرني معاه بجرايره
أبات سليم وأصبح
مكسور ومين يسايره
حبيبي حبيبي حبيبي حبيبي
حبيبي ليه ضفيرة
تسحر زي الفطيرة
مخبوزه بدون خميره
والضحكة ياواد خطيره
تشوفها تقول أميرة
ساكن قلبي بعمايره
حبيبي حبيبي حبيبي حبيبي
حبيبي عقله لاسع
والقلب عنده واسع
يساع كل الحبايب
ولا تعرف ايه مصايره
يديني ميعاد ويمشي
ويسهر لجله رمشي
وجايب لي حمام ومحشي
ويقول لي اسهر منامشي
حبيبي حبيبي حبيبي حبيبي
حبيبي شغل كايرو
معاه الوقت يجري
ومين ف القلب غيره
تقولش ياواد ده مجري
نساني تاريخ ميلادي
أفرنجي ولا هجري
حبيبي حبيبي حبيبي حبيبي
حبيبي شغل كايرو
وجاب للقلب جلطه
نازل أقرب محطة
ويقول لي حطه بطه
أقول فلفل يا شطه
غيرت معاه مصايره
حبيبي حبيبي حبيبي حبيبى
حصل في العقل هفه
جاي وشايل لي قفه
باينه جاله هفه
من الحب وفقايره
حبيبي حبيبي حبيبي حبيبي
عندي أحلى اصطباحه
لما يرازي بصباحه
وأما يراضي بقباحه
أقول
حبيبي شغل كايرو
مافيش ف القلب غيره.
|