القاهرة 10 مايو 2022 الساعة 09:57 ص
شعر: خالد صبحي
عم عبد الله الساعاتي
جنب منه كان بوتيك
وقهوة بلدي فاتحة راديو
جي صوتها من بعيد
كانت أم كلثوم تغني
قبل منها كان فريد
ولا سلمان السوهاجي
لما كان يجي ينادي
يلا فاكهة م السويد
إعلانات عن فيلم سيما
بعد مقلة عم عيد
كشك فاضي بتاع جرايد
محل فيديو فاتح جديد
فاترينات على كل لون
وعم مينا معاه زبون
بعد دكانة الأمانة
أم رامي تبيع زيتون
ذكريات بتروح وترجع
صوت زمان بيقول ونسمع
تسعينات فاتت بخيرها
كل ذكرى فيها توجع
لسه فاكر أرابيسك
مسلسلات الساعة سبعة
حفل أضواء المدينة
لما نسهر للمتابعة
كل حاجة كات جديدة
حتى مصروفنا القليل
كان زمان كان فيه حياة
كل شيء صافي وجميل
كان طموحنا والأماني
نملا كوكتيل الأغاني
من حميد ومنير وشاكر
عدى عمر بشكل تاني
لسه فاكر رغم أني
بَسأل الدنيا التمني
والحياة تسعيني أجمل
دنيا تجري بعد مني.
|