القاهرة 06 ابريل 2021 الساعة 09:59 ص شعر: خالد صبحي خلاص.. وفيت كل أوراقك وجبت اللي طلع مطلوب ولا من تانى تتعذّر وتستخسر تقول معيوب وجبت شهادة عن أصلك وإقرارك يكون مكتوب فهاتلى حسن سير وسلوك وورقة تكون محل ضمان وختم يهون الأحزان وطابع لزق للي سابوك وفرَّق ع القلوب صورة تكون لك ذكرى من بَعدك ما يمكن تاني نبعتلك ويطلع يومها يوم سعدك هتفرق إيه ما تستنى ده اسمك لسه ليه ورقة تقولك إني محتاجلك ومحتاج إني أرجعلك فخلي الإمضا ليك واضحة عشان الاسم ليه معنى وما تلومش اللي باع غدرك كتير اتغشوا ف الصورة وهي الصورة ليه باهتة أكيد ف الأصل مكسورة وهتحاول تخبيها طبيعة وليه بتنكرها تلزَّقها بأعذارك وإصرارك تعيش فيها مصمم ليه تخبيها خلاص من تاني فوت بكره تكون عدِّلت أوراقك تكون خلصت أحزانك تكون جددت أشجانك هتلقى الكل مستني وتلقى القلب خدامك
|