القاهرة 04 مارس 2021 الساعة 10:46 ص
شعر: خالد صبحي
زحام والخلق مش دارية
ولا حاسة ولا طايلة
ولا تعرف طريقها لفين
ولا حاسة بأمل بيلين
وتاهت حتى ضحكتها
وليه مساكين
ونظرتها تضيع منها
في توهة زحمة العناوين
تعالى ياعم وصلني
تعالي وقولي فين أراضيك
دنا صوتي تعب مني عشان بناديك
دنا لسه فطريق الخير يادوب صعلوك
وأنا وعمري وأيامي ياريت يفدوك
هتاخد إيدي تهديني
وللسكة توديني
وتنسى سكة اللي خانوك
هتلقى هناك على الناصية
قصاد دكانة الصابرين
جدع فارش بأحلامه
بيعرض كل شئ ببلاش
وواحد تاني قدامه
بيطلب غرفة الإنعاش
وست كبيرة بتوزع على الحاضرين
رغيف لحمة على روح اللي راح ولا جاش
وتمشي شويتين قدام
هتلقي قلوب بتترامى
قلوب صابها الوجع مرات
عشان كانت بلا لمة
وفكرة إنها تنسى
بقت ف الأصل مش تامة
تصدق إن دول عايشين
إن الصبر خلاهم من الصابرين
فلملم كل دول وياك
ودور ع الطريق بيهم
وحطم دوشة البدايات
ودمر كل اللي يأذيهم
وعيد ترتيبة القوانين
ووزع م العدالة بيوت
تكون بالحب مليانة
تكون رافضة لروحنا تموت
تكون بالأمن متصانة
ولا تسمح بيأس يفوت
وكبر يافطة العنوان
عشان الكل يعرفها
تكون روحها ف كل مكان
تشوف الزحمة أوصافها