القاهرة 09 فبراير 2021 الساعة 04:16 م
شعر: خالد صبحي
من قلب البرد المتخفي ف سحاب أمشير
زعابيب بتكشر وتبرجل وساعات بتطير
أحوال القلب بتتغير مش عايزة كلام
بتراجع أحوالها يومياتي وتقول ده كتير
وتشد لحافها وتتغطي يمكن هتنام
أو ترغي ف لحظة شوق دايب وف أي كلام
وبتمسح دمعه تكون غارت على خد العين
وتفكر ف الضحكة البايرة وتقول ياسلام
صعبان على بكره تكون شمسه بتدفي قلوب
وتقول راح تعدل أحوالها تيجي بالمقلوب
مجنون اللي يفكر يسرح مستني تروق
ده القلب إن فكر يوم يحلم هيعيش مغلوب
في قلوب بتعافر وتكافح علشان بتعيش
وتدق وتفرح وتسافر يمكن متجيش
عشمانه إن الدنيا تساعد لو حتى بأيه
وتقول ف الصيف راح تتمطع من طرف الشيش