القاهرة 12 يناير 2021 الساعة 08:41 ص
شعر: خالد صبحي
ساعات بنصدق الدمعة ولو تكدب علينا سنين
و نتعود على الكدبة ونمحي عقلنا المسكين
ونستخسر نقول يا فراق
ونستحمل نعيش أشواق
مليها الكدب ونطنش عشان خايفين
وتبقى اللعبة جذب وشد
واحد يرخي عشان اتهد
وواحد عاش بيتمنى
تكون أحلامه م الجنة
وصدق إنها بتتمد
وأنا صدقت دمعتها
وخليت الأمان بيتها
ضلوعي رغم قوتها
سابتني جوه ليلة برد
وراجعة تاني بدموعها
تقولي حقيقي باشتاق لك
وشايلة كدبة فضلوعها
وقالت برضه بحتاجلك
وأنا من وسط أوهامي
بعيش الكدبة من تاني
وأصدق سرها الخاين
أتاري الأصل مش باين
في ساعة الغيم محاوطاني
ألاقي طريق ماليه زينة
وألوان كلها بتبرق
وصوت مزيكا مش غربي
ونور من الضلمة بيه يشرق
فقلبي يطير من الفرحة
واحس بروحي سايباني
على المزيكا ليه ترقص
يقيد ف النور بنور تاني
وأعيش تفاصيل ف كدبتها
وناسي إن قوتها
برغم هدوء ملامحها
بتعشق إنها تخوني
منا ف الغفلة تاه ظني
وفاكرة السر متداري
وأنا عيني خلاص شايفاه
دي مركب ليها ميت ساري
بكل الكدب ليه مالياه
فأمني بكل وجدانك
عشان شايل فقلبي كتير
بأن الهجر شيء وارد
ده سرك لسه برضه ف بير