القاهرة 05 يناير 2021 الساعة 08:52 ص
شعر: خالد صبحي
رميت الدنيا من ضهري
وبعت الكدب بالكيلو
وجبت لقلبي جاكت جلد
وبوت بني وساعة يد
وقولت لعقلي يستنا
ليوم القبض
منا اللي ياما دلعتك
وقويتك وشجعتك
وكنت تملي تهريني من التفكير
خلاص يا كبير
هتعملها كده زعلا
وتستكبر وتستعلا
ما تهدى حبه وتروق
مكانك برضه متزوق
ولسه في الدلع مشاوير
خلاص يا كبير
هتستغبى ف آخر الخط
وتتكبر ترد الرد
ما برضه القلب من حقه يكون رايق ولابس شيك
عشان قلبي لو اتجنن هيمسك فيك
ويعلا خناكم التافه ما بين الجرح والتشكيك
عدل نضارته واتأمل
وخد نفس السيجارة رماه
وقالي استنى لو تفهم
وتستهدى كمان بالله
ما طول عمرك بتمشي وراه
مكان ما يدق تستناه
وتسمع منه تدروش
وتتحول كمان وياه
اشوفك معمي بكلامه
وتتحول لخدامه
وهو يبقا سيد سيدك
أوامره تبقى طوع إيدك
ولو طلب النجوم تلقاه
وجيت على بختي تتحمل
وبرضه لسه بتكمل
ما ياما القلب كان تعبك
وكان بالعشق بيلاعبك
وتغرق منه تستنجد
وأول ما الغرام يخدك
تبطل حتى تسمعني
ياعيل ف الغرام باعني
أنا توبة أقول تاني
وعيش ف السكة وحداني
وخلي القلب يشفعلك
مدام خليتني يوم زينه
خلاص بقا عيش وورينا
هتبقى حاجه من بعدي
وصوت قلبك يصحينا
منا عارف آخرها جروح
وترجع تشكي تسمعلي
ساعتها هقولها بس تروح
ياخيبتك وانت راجعلي