القاهرة 05 مايو 2020 الساعة 07:28 م
شعر: سعيد شحاته
ماشي ف حواري الحياه خايف ومتخفي
راسم عيون الحبايب والسما ف كفي
يا بحر عناب بيشعل نار وبيطفّي
سيدي وحبيبي وحبيبتي وستّنا ف صفّي
.......
النهر رمّاح كما الخيل ع الطريق سارح
والقلب طير مفترس لو صادفه طير جارح
زارع ملامحي في ملامحك والبدن طارح
زيّ الجناين شجر شايل ومتكفّي
.......
يا أرض نبعي النهار والشمس والزينه
والتمرحنه الحزينه ف دوشة المينا
حنّي علينا بغناوي تفوق غناوينا
واياك تعاندي الأماكن فينا وتجفي
.......
الفرق بين الحنيّن والغبي معروف
الأولاني ابن نور والتاني طوب مرصوف
عيش بالمحبه... النهار للطيبين موصوف
يا صوف بلادي البدن بالأهل متدّفي
.......
خايفين كما النمل من دقة طبول سليمان
الحرب مش حرب جيش واقف لجيش ف ميدان
الحرب حرب الديوان والقصر والغلبان
حرب احتمال الإيمان لو ناويه تتشفّي
.........
يا أرض كوز العسل سايل على إيدينا
مستغفرين ربنا... ومتدفّيين بينا
لا عنينا حاولت تشوف ولا شوفنا بعنينا
خفي علينا برجولك واصفحي وخفي
........
لسه الأمل ع الشجر طارح أمل غيره
ولكل سير دورته ولكل عود طيره
ربّك ف سابع سما وعايشين هنا ف خيره
وان يوم وزنّا الإيمان بيزيد وبيوفّي
.........
بالرحمه يا رب دايمًا فينا مش بالعدل
الرحمه بتساع حرامي القوت وطبع الندل
عايشين بفضلك هنا ومتنعمين في الفضل
زايد بخيرك علينا يا رب ومكفّي
.........
يا أرض زيحي الوجايع واغسلي وشك
ظهر اللي واخدك أميره واللي بيغشّك
مش ناقصه خوف م اللي بالسكينه بيقشّك
زيحي الغمايم وزفّي الفرح واتزفّي
..........
خُف الجمل ع السكك علّم على الجمّال
كل اللي عارف وساكت كائن ابن حلال
يا رابطه قلب الغلابه ودايسه بالأغلال
الشعر عال والكلام موزون ومتصفّي