القاهرة 07 ابريل 2020 الساعة 11:30 ص
يا رب يا رحمن يا خالق الإنسان علمته يزرع ويصنع يكتب ويرسم ويبدع اجمل ما فى الإمكان ايه اللى عمله بقى ؟! دى حربة .. ودى مشنقة ودى مقصلة ومحرقة وده بمب وده كبريت ودى قنبلة وديناميت و دى فيروسات أوبئة مصنوعة متخلَقّة تسكن فى قلب الرئة تقضى على الإنسانية وتعيد زمان الشقا
يا رب يا شافى العلم موش كافى وعدونا المجهول مقروض و متعافى مالهوش دماغ وايدين ولا يمشى على رجلين ولا يشوفوه بالعين لكن غلب ملايين والجبارين خايفين وأغنى خلق الله صبحوا من المساكين حتى اللقا فى الصلاة والاهل محرومين !
يا رب يا ستار يا عالم الأسرار احمى اطباء مصر من كافة الأخطار واحمينا م التُجّار الأذكيا الشطار اللى فى وقت المحن غلوا علينا اللبن والرز والماكرونة والناس بأرخص تمن تتباع فى سوق الكورونا جمعوا ليوم القيامة كنز الندم والندامة دى عقول لازمها كمامة عطس عليها الشيطان
يا رب نجى البلاد المؤمنين والعباد اللى بيرفع ايدين من كل ملة ودين ويوحدك فى علاك يبكى ويطلب رضاك وبرحمتك يستعين يا رب يا رحمن فى النصف من شعبان اقبل دعا الصالحين منا فى كل مكان وبحق كلمة آمين وبحق طه الأمين الرحمة للعالمين وبحق موسي الكليم وبحق عيسي الحنان بلغنا شهر الكرم والرحمة والغفران واقبلنا فى رمضان واجمعنا فى الصلوات وارزقنا بالخيرات وبالشفا أجمعين
|