القاهرة 01 اغسطس 2016 الساعة 04:47 م
حزن الختام
الليل ملجأ
ونجوم الليل ف السما.. أيتام
قمر اتعلق..
مشنوق علي حبال الأيام
حزن الختام قلبي
مستني يرحل بي..
غنوة شجن فرحان
سكران بنبل الموت
طبطب علي الملكوت..
تلاقيني عند البحر
مسي لي ع الأوطان
إللي ما عرفتنيش!!
بكره اللي جاي ييجي
قلبي يقول ما يجيش
عيني تسقط ريش
والنن كان طاير
بيودع الحكايات
ويلملم الذكري
رافض أشوف الشمس نسر حكومي متكتف
علي دفتر السماوات
موات يومي
طوابير بهستيريا نظام الكون
والإبتسام السام وسام
علي كرسي هش!
هيه..
قلت اللي عندي واديني ماشي
هيه
يا قلبي يا ابن الإيه؟!!
بعد إشتعالك في الأحلام مش باقي غير..
إنك تفجر نشوتك
حزن الختام!!