القاهرة 04 اكتوبر 2015 الساعة 03:09 م
حين تصاب بحالة من الإحباط واليأس من أفعال الكبار .. انصحك باستراحة ولو قصيرة مع الأطفال ،و تكون المتعة بقدر حجم البراءة التى ستتعامل بها مع براءتهم ..لتكن البراءة هى مفردات اللغة بينك وبينهم .. لكن المتعة الأكبر والمكسب أن تخرج من الحوار أقصد الاستراحة ببعض البراءة .. طبعا أشك فى هذه النتيجة .. المهم خضت التجربة منذ أسابيع وحاولت ، لكن خدعتنى الحيلة ولم أصمد كثيرا .. تعالوا معى فى هذه الرحلة القصيرة فى عالم الأطفال ..و البداية كانت فى هذه الجملة قبل دخول المدرسة من طفل "لمض "حبتين حين سألته عن المدرسة .. قال :
إمتى تيجى المدرسة أصلها "وشحتنى" قوى ووشحتني يعني وحشتني في اللسان اللي لسه متعدلش كلامه وبيطلع الكلام زي السكر من بعض أصحابي منكم
بس السؤال اللي عايز اسأله لكم بجد: إنتم زهقتم من الإجازة ولا لسه؟
الإجابات علي السؤال ده كانت كثيرة.. تعالوا نشوف أصحابكم قالوا إيه؟
واحد قاللي: أنا بحب اللعب قوي وعلشان كده عايز أشوف أصحابي اللي في المدرسة علشان ألعب معاهم في الحوش.
واحد تاني شقي قال: لا.. أنا م زهقتش من الإجازة وأنا مش عايز المدرسة ترجع علشان المذاكرة وكل شويه بابا وماما يقولولي ذاكر ذاكر.
والسؤال اللي عايز اسأله لكم تفتكروا اللعب علي طول حاجة كويسة ؟
طب لو كان الكلام ده صحيح طب لو قضينا حياتنا كلها لعب في لعب طب ح نشتغل إيه لما نكبر زي بابا ؟
رن في ودني سؤال واحد منكم وح نشتغل ليه ؟
بصراحه أنا اندهشت من السؤال ده علشان مكنتش متوقعه من واحد منكم.. ليه ؟
علشان عدة أسباب منها:
طب لما الواحد ما يشتغلش ح يجيب فلوس منين علشان يشتري اللي هو عاوزه ؟
لقيت واحد شقي تاني منكم بيقول: ح أخذ فلوس من بابا وماما.
معقولة ح ناخد فلوس منهم طول عمرنا.
لا.. لازم إحنا نعتمد علي نفسنا ونشتغل ونكسب فلوس من شغلنا طب ح نشتغل إيه لو متعلمناش كويس؟
والسؤال الأهم ح يبقي تفكيرنا إزاي لو م تعلمناش كويس ؟.. وح نتعامل إزاي مع الناس لو م تعلمناش كويس ؟
وكمان الحاجة المهمة قوي بلدنا ح تتقدم إزاي علشان تسبق أمريكا وإسرائيل وأوروبا من غير م تبقي بلدنا متقدمة.. وح نبقي متقدمين إزاي ونسبق العالم لو م ذاكرناش كويس واتعلمنا كويس قوي..
عايزين نسبق أمريكا ولا عايزين نبقي كسالي ؟
يعني نتعلم ونذاكر ونشتغل ولا نلعب وم نذاكرش وتبقي إسرائيل احسن مننا برافو.. بيقولها أصحاب كثير منكم لازم نذاكر ونبقي متفوقين علشان خاطر بلدنا وعلشان نبقي أولاد كويسين.
بس ح اقول لكم حاجة.. مفيش مانع نلعب شويه ونذاكر شويه.. نلعب شويه ونحفظ قرآن ونروح الجامع نصلي.. نلعب شويه ونروح الكنيسة نصلي.
نلعب العاب علي الكمبيوتر شويه ونتعلم البرامج المختلفة وندخل علي الإنترنت ونتعلم لغات.
نلعب شوية ونروح النادي نلعب رياضة تقوي جسمنا علشان "العقل السليم في الجسم السليم."
عايزين نتعلم علشان يطلع مننا علماء ومخترعين علشان مصر تتقدم وتسبق امريكا عايزين نتعلم فنون ورسم وموسيقي علشان نبقي فنانين وأدباء كبار عايزين نتعلم ونلعب رياضة علشان نبقي أبطال العالم في الرياضة إيه رأيكم ؟
اتفقنا
هل يعيد رئيس الوزراء الاعتبار
لعبد الناصر في التليفزيون؟
في ذكري رحيل الزعيم الراحل جمال عبدالناصر متي نعيد حقه التاريخي في إنشاء التليفزيون ومبني ماسبيرو؟.. الحكاية فعلها صفوت الشريف في إطار حملة النفاق لحسني مبارك.. وقام بإزالة اللوحة المعلقة في مدخل مبني التليفزيون والتي تشير ليوم افتتاح التليفزيون وقيام الزعيم جمال عبدالناصر بالافتتاح وأثناء تولي عبدالقادر حاتم لمنصب وزير الإعلام أو الإرشاد القومي.. المهم خلع الشريف ومبارك اللوحة وعلقا بدلا منها لوحة تشير إلي افتتاح الجراچ الملحق بالمبني مكان لوحة الزعيم .. بالذمة هل هناك مسخرة أكثر من كده؟ وأكمل الشريف المهزلة بإزالة التماثيل النصفية للرئيسين جمال عبدالناصر وأنور السادات.. يعني من بني جراچا توضع لوحته ومن انشأ الكيان الضخم تزال لوحته وتمثاله؟.. المهم كما تدين تدان.. بعد ثورة 25 يناير تم إزالة لوحة مبارك أقصد لوحة الجراچ وتمثاله أيضا!!
هل يعيد المهندس شريف إسماعيل رئيس الوزراء الاعتبار للزعيم ويأمر بإعادة اللوحة الأصلية للزعيم التي تشكل جزءاً من تاريخ الوطن والتليفزيون والإعلام المصري والعربي؟
هامش
•احتكروا الدين وكانوا عايزين يحتكروا كمان الدنيا علشان يبقى أخدوا الدنيا و كمان الآخرة وإحنا نخرج بلوشى من الاثنين .. بالذمة ده عدل ياناس .. يا تاخدوا الدنيا .. يا تاخدوا الآخرة .. المهم سيبولنا حاجة ولا حناخد الاثنين منكم وتاخدوا أنتم صابونة .. وده بصراحة اللى حصل !!
• الفلول عاملين زى البراغيت فى جلابية الفلاح الغلبان .. الحرق هو الحل .. بس الفلاح خايف من البرد ومن السرطان اللى اسمه الإخوان !!
• تافه وأحمق من يظن أنه يمكن أن يخفى الشمس بكم جلبابه الملوث بدماء الضحايا من أصحابه وأصحاب الفضل عليه!!
• المرارة التى يشعر بها العظماء سببها وجود هم على دكة الاحتياطى أو فى مدرجات المشاهدين والعجزة أمامهم فى الملعب يجرون أذيال الهزيمة!!
• الأقزام لا ينفع معهم العلاج أو البتر .. لا ينفع معهم إلا الحرق
• قد يكون الموت بداية حياة جديدة لا نعرفها .. لكن الكارثة والعذاب الذى لا يطاق أن تكون الحياة عبارة عن رحلة موت نشاهد فصولها أمامنا وببطء شديد !!
• كثير من الموتى أحياء بيننا وكثير من الأحياء حولنا .... أموات أموات
• نقول تور يقولوا احلبوه ... مفيش فايدة !!
• ليت الموتى يتكلمون حتى يخرس الكثير من الأحياء
yousrielsaid@yahoo.com