القاهرة 23 اغسطس 2015 الساعة 02:21 م
.إزاي بيقولوا إنك موتي؟
إلى روح الأم والصديقة "ابتهال سالم"
إزاي بيقولوا إنك موتي؟
وأنا لسه عيوني لمحاكي وأنا داخله المطبخ
خارجه من الحمام ملفوفه ببشكيري الأحمر
وشعرك نازل على كتفك وريحة الشامبو مليا الشقه
إزاي بيقولوا إنك موتي؟
وأنا سامعه صُوتٍك بيرن ف ودني
انتٍٍِي يا بت جدعه بس لو بطلتي العصبيه
كنتي ارتحتي وريحتي
إزاي بيقولوا إنك موتي؟
طب والأكل اللي طبخته مين هيقولي عليه غيرك
الله على نفسك يا بت انتي
إزاي بيقولوا إنك موتي؟
وعبايتك اللي عندي.. مين يلبسها من بعدك
من يوم ما جتيني أول مرة وهي بتاعتك وبإسمك
إزاي بيقولوا إنك موتي؟
مش قادرة أسامح نفسي لما اتنرفزت عليكي
لما فتحتي ستارة البلكونة ونسيت إنك يا حبيبتي
من شوفة الشارع محرومة من شقتك المكتومة
إزاي بيقولوا إنك موتي؟
طب وميعادنا في الإتيليه، وكلامنا اللي لساه مخلصشي
والسينما والمسرح والبستان والشيشة وريحة الدخان
والقهوة السادة والقعده الحلوه وقراية الفنجان
مع مين هيكونوا لو صح اللي بيتقال
إزاي بيقولوا إنك موتي؟
وفطار رمضان وسحوره
مع مين هيكونوا المره الجايه
والندوات والسهرات للصبحيه
إزاي بيقولوا إنك موتي؟
وأنا شايفاكي بتجري
فرحانه
بالكوتشي اللي بيمشي لوحده
زيي الأطفال لما تجيبي حاجه جديده
وألا الزغاريد ف الشارع يوم ما اتزاحت الغمه
إزاي بيقولوا إنك موتي؟
طب مين هيطبطب على جرحي
وينصحني. ويقولي أوعي لبيتك
دا الخراب مش سهل يا بنتي
إزاي بيقولوا إنك موتي؟
لو كنتي صحيح موتي
كنت اتوضيت بمية غُسلك
كنت صليت وياهم
كنت مشيت ف جنازتك
كنت دعيت لك على قبرك
إزاي بيقولوا إنك موتي؟
مش قادرة أصدق كدبتهم
انتي مسافرة وراجعه زيي المرات السابقه
أنا شايفاكي بتبصي عليا من سقف الأوضه
وبتقولي هشوفك إمتى؟