القاهرة 28 يوليو 2015 الساعة 10:53 م
بالظبط
بالظبط
اللى بيحصل دلوقتى
زى ما كان
لما الجرح بيوسع فيك
فتروح على مركب مصنوع من تذكرة الأتوبيس
عملته زمان لحبيبتك
لجل يعديك
ما يكفيش أحلامك
حبيبتك تاخد أحلامك
وانت تاخد وياك القهر
زى اللى بيحصل دلوقتى بالظبط
اعدل إيدك
جيب آخر طلقة ف صدرك
كنت شايلها ذكرى من صاحب خانك
يمكن
أو من حب قديم
مش فاكر بالظبط
اعدل إيدك ناحية راسك
ما تغمضتش
وكأن الطلقة
بوسة أمك لجبينك
مع إنه ما حصلش
ولا حتى طبطب كف إيديها على ضهرك وأنت بتشيل النعش
بس كأنها بالظبط
وكأن الدم النازل لعيونك
عرقك ف الورشة مع أخوك
سايل على رقبة عود نشفان
اتكسر من ضرب عساكر شبهك ف مظاهرة
عرقك ده ما بينشفش
مش عارف ليه بالظبط
استنى
من حقك تحرق آخر لفة تبغ ف جيبك
ما تخافش
ملك الموت أعقل من أنه يسيبك لمجرد ريحة بقك
من حقك ترمى على عيالك
آخر نظرة خوف من بكرة
وتغطيهم
تعرف
أروى تشبه حزنك بالظبط
على قد الحجم قليل
على قد مابيفيض ع الحد
على قد ماتاخد كل الناس ف عنيها
على قد ما ملهاش حد
تعرف
يوسف ماحلمش بجد
وما حدش شد قميصه
ولا شاف الدفا ف قصور
ولا داق فى السجن البرد
بس رسالته
أصعب مليون مرة
فى هذا الزمن اللإد
مع إنه مش نبى بالظبط
إيه هنعيط..........؟
ما تخافش
كلها كام شهر وينسوك
سيبك
اعدل إيدك
ولا استنى
هاتروح للموت إزاى
وأنت ماتعرفش سكته بالظبط