القاهرة 19 اغسطس 2014 الساعة 02:17 م
شبه الحُزن
سعيد عبد المقصود شعر
خليك خفيف
كأن ضل ما لوش ملامح
أو حتى خيال
وهوه بليلمع ف عنيك
بيحلم ما يتحققش
خليك أخف
كانها دنيا
وكأنك ف السبق
قاصد ما تكسبشى
خليك أخف
من خِفتك وانت بتقع
ما تقلقش
ما فيش حته من جسمك
حترتاح للأرض
زى ما تدخل ع الشقا
ف طلعة شمس
ويطلع منك ف هبِة ريح
ساند خدوده بخفه على راحة ايديك
خليك أخف
من غير تسريحة شعر
تركيبة عرقك أحن عليك
من ريحة البرفان
خليك أخف
كأنها دنيا
ف آخر الفيلم
قاصده تضحكلك
تضحكلها
بحلاقة دقنك
ولبس طفم جديد عليك
اختارك
من كرهُه لصاحبه القديم
كأنها دُنيا
وكأن قطر بيدخل محطتها بهزايم
يملاها بنى آدمين
ما يميزوش ريحتك
ولا يحسًوا بهزة ايديك
ما يفضلش منك غير عينين بيلمعوا
بمجرد ما تلمح أي ناصية
توصل لها
خليك أخف
وكأن بنت بتحبها
فتحب لك كل البنات
يعملو لك عيد
يرقصوا ف عنيك
كل الحاجات اللى
ما فضلتش على حالها
خليك أخف
حاسب
سما فوقك
عدى من بابها
ايه ده
الله.. اللــــــــــــــــــــه
بأطير.
*******************
دخلو الاجانب ع الحضرة يا ابو العباس
سرقوا المراكب يا حامى شط البحر
وهبى يا ريح هبى
والحق ميدان السيدة يا حسين
نفيسة العلوم بتطلب النجده
طلعوا الاجانب مننا فينا
وبقينا يا بدوى
كلنا أسرى
**************
كأن توهه وعارف معادها
وقايم لها ف روحى مكان
مظاهره ف جسمى تقوم
وقنابل عياط تنضرب
علشان تفرق مشاعر
لبنت بتحبنى
وركبت فى روحى
حصانها اللى عارف حُبها للرَمْحْ
ليها
حأطلق مراكب الزينه
ف البحر الحزين
وأنَوَّر الموج
لفرحة العيال باللعب
بإيدها
حتقيد الشموع
ف سكه مرسومه
على لوحة كبيرة
ف أخر الميدان
والناصيه غرقانه دم وعِناد
شافتنى
بأطلق المراجيح من صدرى
والريح مطاوعاها
وبتحضن الأرض
اللى رفضت
لغير ضحكها تفرد جناح
ويا غُنا يا بلااااااااااش
ـــــــــــــــــــــــــــــــ