القاهرة 04 اغسطس 2014 الساعة 01:34 م
رجقه
شعر .. على سيد شحاتة
مهداة الى ..
ايمان حجو
اصغر شهيدة قلسطينية
جنوب الخليل 8\ 5\ 2001
( اليها .. والى كل الزهور وزهرات غزة )
ننه نام .. ننه نام
شارون ..
يدبح لك الحمام
ننه نام .. ننه نام
شارون ..
يدبح لك السلام
ننه يا ايمان
ننه يا ايمان
وبيخلص منى الكلام
ويتوه منى القول
تتوه العقول
معقول .. !!
هوه انتى ليكى ماضى
ف العنف والاجرام ؟!
ف الهتاف والكلام ؟!
ولا .. صوابعينك النونو
يكونوا
حدفوا حجر
ف وش الغجر
وانتى طالعه .. ف المظاهره
وانتى يا زهره .. يا طاهره
رضعتى الغضب
ف عودك اتنصب
وقلبك انفجر ؟؟!!
والعقل جن جنونه
القلب انفطر
..
الدم متجمد ف عيونه
ساعتها ..
حسيت بالخطر
عيونى ..
قلبى ..
دماغى .. اترجو
وانا باشوف الخبر ..
( اسرائيل ..
تقتل .. ايمان حجو )
شفت الصور
و شفت اللى احتجو ..
الصوره موحشه
الرصاص ..
مطرح الخلاص ..
خرجت الحشا
ايد متوحشه .. !!
اى جبن .. اى قلب ؟!
اىغبن .. اى كلب ؟!
يا كل ابن .. يا كل اب
يا كل ام .. يا كل اب
صعب .. !!
صعب .. صعب
ولا باملك يا صغيرتى
غير الدمع
و الشعر
والرجفه
..